काठमाडौं: सरुवा हुने बेलामा महानगरीय
प्रहरी परिसर काठमाडौंका एसएसपी उत्तम कार्की र महानगरीय प्रहरी कार्यालयका
आयुक्त बिज्ञानराज शर्माबीच विवाद बढेको छ । परिसरलाई थाहा नै नदिई आयुक्त कार्यालयले डान्सबारहरुमा छापा हानेपछि एआईजी र एसएसपीबीच विवाद बढेको हो ।
आयुक्त कार्यालयले गत साता दरबारमार्ग,
ठमेल तथा बानेश्वरका विभिन्न डान्सबारहरुमा छापा हानेको थियो । एआईजी
बिज्ञानराज शर्माले डिएसपी राजकुमार सिलवाललाई डान्सबारमा छापा हान्न
लगाएका थिए । यू क्यान सी मी, ओएमजी, मिर्ची, ब्लाकआउट लगायतका डान्सबारमा
छापा हानिएको थियो । आयुक्त कार्यालयले छानी छानी केही डान्सबारहरुमा छापा
हानी कर्मचारी समेत पक्राउ गरेको थियो ।
जसको विषयमा आयुक्त कार्यालयले नजिककै
प्रहरी वृत्तलाई समेत जानकारी दिएको थिएन । आयुक्त कार्यालयले डान्सबारबाट
पैसा उठाउन त्यसरी छापा हानेको आरोप वृत्त इन्चार्जहरुले लगाएका छन् ।
डान्सबार र डिस्को प्रहरीको नियमित
आयस्रोत बन्दै आएको छ । नियमित झगडा हुने भएकाले उनीहरुले प्रहरीलाई मासिक
पैसा खुवाएर सेटिङ मिलाउँदै आएका छन् । पैसा नदिए झगडा हुँदा प्रहरीले
मालिकलाई नै लगेर थुन्ने गर्दछ । पैसा दिएको खण्डमा प्रहरीले झगडा गर्नेलाई
मात्र पक्राउ गर्दै आएको छ ।
उता, काठमाडौं परिसरको प्रमुखमा एसएसपी
राजेन्द्रमान श्रेष्ठ र बिक्रमसिंह थापाबीच प्रतिस्पर्धा छ । एसएसपी
श्रेष्ठलाई काठमाडौं परिसर पठाउन प्रधानमन्त्रीले आईजीपीलाई निर्देशन दिएका
छन् भने आईजीपी भने राम्रो काम गर्ने थापाको पक्षमा रहेको स्रोत बताउँछ ।
0 Comments