काठमाडौं । अख्तियार दुरुपयोग अनुसन्धान आयोगले छानविनको तयारीमा राखेका सशस्त्र प्रहरीका अतिरिक्त महानिरिक्षक दुर्जकुमार राईलाई सरकारले कायम मुकायम महानिरिक्षकको जिम्मेबारी दिएपछि विवाद चुलिएको छ ।
संगठनमा लामो समय काम गरेपनि उनका दर्जनौ विवादहरु सार्वजनिक भएका छन् ।
०६२÷६३ को जनआन्दोलन दबाउनका लागि सक्रिय रहेका उनलाई दोषी ठहर गरिएको थियो । तर, सरकारले जनआन्दोलनको वेवास्ता गर्दै उनलाई कायम मुकायम महानिरिक्षकको जिम्मेबारी दिएपछि आन्दोलनका घाइते र पीडितको अपमान भएको बताइन्छ ।
उता, आन्दोलनका दोषीमात्र नभएर राईको नागरिकता विवाद पनि बाहिर आएको छ । नागरिकतासहित उनको उमेरमा पनि विवाद देखिएको छ । सशस्त्र प्रहरी बलको रेकर्डमा नै दुर्जकुमार राईको नागरिकता विवाद छ । भोजपुर जिल्लामा जन्मिएका राईको नागरिकता प्रतिलिपि काठमाडौंबाट गरिएको थियो ।
भोजपुरमा बनाइएको नागरिकतामा दुर्जधन वान्तवा राईका नाममा नागरिकता लिएका उनले काठमाडौंबाट दुर्जकुमार राईको नाममा प्रतिलिपि बनाएका थिए ।
त्यसो त एसएलसीको प्रमाणपत्रमा समेत उनको उमेर विवाद भएपछि सशस्त्र प्रहरीले परिक्षा नियन्त्रण कार्यालयसँग जवाफ मागेको थियो ।
तर, परिक्षा नियन्त्रण कार्यालयले भने दुर्जकुमार राईको उमेर केरमेट भएको भनी सशस्त्र प्रहरीमा पत्राचार गरेको थियो ।
0 Comments