काठमाडौँ–जनकपुर पर्यटकीय बस सञ्चालन

काठमाडौँ, २५ कात्तिक । दिपज्योती टुर्स एण्ड ट्राभल प्रालिले पहिलोपटक काठमाडौँदेखि मुलुलकको पर्यटकीय गन्तव्य जनकपुरसम्म पर्यटकीय बस सञ्चालनमा ल्याएको छ ।

यसअघि काठमाडौँ–पोखरा बस सञ्चालन गरेको दिपज्योती ट्राभलले आजदेखि काठमाडौँ–काभ्रे–सिन्धुली–बर्दिबास हुँदै जनकपुरसम्म बस सञ्चालनमा ल्याएको हो ।

प्रालिका सञ्चालक टङ्क थापा प्रदेश नं २ र नेपालकै प्रमुख धार्मिक स्थल जनकपुरलाई पर्यटनसँग जोड्न उक्त बस सञ्चालनमा ल्याएको बताउनुहुन्छ । काठमाडौँको सोह्रखुट्टेबाट बस विहान ७ बजे छुट्ने उहाँको भनाई छ ।

टुरिष्ट बस एशोसियशन अफ नेपाल (टिवान)का अध्यक्ष प्रह्लाद लोहनी मुलुकको पर्यटन विकासका लागि काठमाडौँ–जनकपुर पर्यटकीय बस सञ्चालन सेवाले ठूलो सहयोग पुग्ने बताउनुहुन्छ । “सन् २०२० सम्म २० लाख विदेशी पर्यटक भित्र्याउने सरकारको लक्ष्य पुरा गर्न यस्ता सेवाहरुले सहयोग पुग्नेछ,”–उहाँ भन्नुहुन्छ ।

दैनिक आन्तरिक तथा बाह्य हजारौँ पर्यटकलाई ओहोरदोहोर गराउने पर्यटकीय बसका लागि छुट्टै बसपार्क नहुँदा समस्या परेको छ । काठमाडौँको कान्तिपथबाट पर्यटक बोकेर देशका विभिन्न पर्यटकीय भूभाग जाने गरेका पर्यटकीय बस यतिबेला बसपार्कको अभावका कारण सोह्रखुट्टे सडकबाट यात्रुहरु बोकेर जान बाध्य छन् ।

पर्यटन विकासका लागि एशोसियशनले यसअघि पोखरा, सौराह र लुम्बिनीमा पर्यटक बस सञ्चालनमा ल्याइसकेको छ । आगामी दिनमा बर्दियामा समेत बस लैजाने लक्ष्य राखिएको अध्यक्ष लोहनीको भनाई छ ।

हाल काठमाडौँबाट देशका विभिन्न भागसम्म पर्यटकलाई ओहोरदोहोर गराउन एकसयको हाराहारीमा पर्यटक बस सञ्चालनमा रहेका छन् ।