काठमाडौं । महानगरीय प्रहरी प्रभाग कपनको एक टोलीले राजधानीको पेप्सीकोलाबाट
अवैध लागूऔषध ब्राउन सुगर जस्तो देखिने खैरो धुलो पदार्थ अन्दाजी २.९५ ग्राम सहित
३ जनालाई बुधबार पक्राउ गरेको छ । पक्राउ पर्नेहरुमा काठमाडौं पेप्सीकोला बस्ने झापा सनि
आर्जुन नगरपालिका-८ घर भएका ३० वर्षीय संजय चौधरी, झापा बाह्रदारी गाउँपालिका-२ घर
भएका ३६ वर्षीय महेश लिम्बु र झापा चारपानी नगरपालिका-३ घर भएका ३७ वर्षीय सुनिल
लिम्बु रहेका छन् ।
उक्त स्थानमा लागूऔषधको कारोबार भइरहेको भन्ने सूचनाको
आधारमा प्रहरी प्रभाग कपनबाट खटिएको प्रहरी टोलीले उनीहरुलाई उक्त लागूऔषध सहित
फेला पारी पक्राउ गरेको हो ।
यसैगरी काठमाडौं नयाँ बसपार्कस्थित बिजी मल अगाडिबाट ललितपुर लामाटारका २३ वर्षीय सौगात पौडेल र नुवाकोट छाप घर भएका २५ वर्षीय पेम्वा लामालाई नियन्त्रित लागूऔषध डाइजेपाम र फेनारगन ४५ एम्पुल सहित मंगलबार बेलुका प्रहरीले पक्राउ गरेको छ ।
उनीहरु सवार बा.२० च ५६२४ नम्बरको कारलाई नयाँ बसपार्क बिजी मल अगाडि फेला पारी जाँच गर्ने क्रममा गाडीभित्र लुकाई छिपाई ल्याएको अवस्थामा उक्त लागूऔषध सहित चालक पौडेल र कारमा सवार लामालाई प्रहरीले पक्राउ गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ
0 Comments