राजधानीको टोखाबाट १ सय ५२ नक्कली नाेट बरामद

काठमाडौं । महानगरीय प्रभाग नयाँ बसपार्कको एक टोलीले राजधानीको टोखा नगरपालिका-१० गणेशस्थानबाट नक्कली नेपाली रुपैंया १ हजार दरका १ सय ५२ थान शनिबार बरामद गरेको छ । 

उक्त  नगरपालिका गौतम श्रीपालीको घरमा डेरा गरी बस्ने हिक्मत मिया समेत २ जनाको कोठामा नक्कली जाली नोटको कारोवार भइरहेको भन्ने सूचनाको आधारमा प्रहरीले हिक्मत मियाको कोठामा पलङ मुनी लुकाईछिपाई राखेको नक्कली नेपाली रुपैंया १ हजार दरका ११ थान र सोही घरमा डेरा गरी बस्ने पोमबहादुर कुँवरको कोठाबाट नक्कली नेपाली रुपैयाँ १ हजार दरका १ सय ४१ थान फेला पारी बरामद गरेको हो । 

फरार रहेका हिक्मत मिया र पोमबहादुर कुँवरको प्रहरीले खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको छ ।