काठमाडौं । ३ चैत २०७५ मा पत्नी सीता दाहालको उपचारका लागि छोरी गंगासमेतलाई
लिएर अमेरिका प्रस्थान गर्न लागेका प्रचण्डलाई ‘राजा’झैं विदाई गर्न
तत्कालिन योङ कम्युनिस्ट लिगका कार्यकर्ता लिएर विमानस्थल पुगेका थिए, रामप्रसाद सापकोटा । त्यसबेला वैदेशिक
रोजगारीमा जान लागेका कतिपय नेपालीलाई अन्तर्राष्ट्रिय उडान प्रवेशका लागि अवरोध
नै गरेर कार्यकर्ताको टुकडीको लस्कर लगाएको उपजमा सापकोटाको अपेक्षा थियो, एकीकृत युवा संघको अध्यक्ष ।
त्यसअघि प्रचण्डनिवास खुमलटारमा विभिन्न डेलिगेशनसहित अध्यक्षमा आफू नै
हुनुपर्ने अडान राखिदिन आग्रही बिन्तिपत्र पनि चढाएका थिए । प्रचण्डबाहेक उनका
परिवारका सदस्यसँग पनि उनले उठबस बलियो भयो । यसको परिणाममा उनले टिका थापेर
एकीकृत युवा संघको संयोजकको जिम्मेवारी हात पारेका छन् । सापकोटा के मा विश्वस्त थिए भने जसरी उनी
वाइसीएलको नेतृत्वमा टिका लगाएर आउन भ्याए, स्पर्धा र योग्यतामा हुने विश्वास कम थियो । वाइसीएलमै रहेर
उनीसँग काम गरेका एक युवा भन्छन्,‘अगाडि चर्को कुरा
गर्ने र शक्ति केन्द्रमा धाउने उनको पुरानै बानी हो । यसरी नै अहिलेसम्म नेतृत्वमा
पुगेका छन् । तर नेतृत्व कमाण्ड गर्नचाहिँ सफल देखिँदैनन् ।’
नेपाल कम्युनिस्ट पार्टीको सचिवालय बैठकमा प्रधानमन्त्री तथा अध्यक्ष केपी
शर्मा ओली सापकोटालाई संयोजकको जिम्मेवारी दिन तयार थिएनन् । बेलामौका सरकार र
राष्ट्रपतिको समेत मानमर्दन हुनेगरी सामाजिक सञ्जालमा लेख्ने र मिडियामा बोल्ने ‘चार्ज’ ओलीले लगाएका थिए । तर प्रचण्डले अडान् नछाडेपछि पार्टी नेतृत्वले तयार पारेको
अर्को पत्रमा अब आइन्दा सरकारविरोधी अभिव्यक्ति नदिने विषयमा ल्याप्चे लाएर उनी
युवा संघको संयोजकमा चुनिए । ‘यो सर्वसम्मतीको
निर्णय थिएन, नेताले टिका लाएर
दिएको पद हो । यस विषयमा भोली फेरि पनि बहस चल्न सक्छ’, युवा संघका एक केन्द्रीय सदस्य भन्छन्,‘हामी मुठभेडमा उत्रिएको वाइसीएलको नेतृत्वमा
कसरी युवा परिचालन हुन्छ भन्ने ध्रुवीकृत बहसमा पनि छौं ।’
पार्टी एकीकरणमा नेताले लिएको निर्णयलाई तत्काल स्वीकार गरे पनि महाधिवेशनमा
सापकोटा नमज्जाले पराजित हुने विश्वासमा युवा संघका सदस्यहरू रहेका छन् । ‘हामीले यो बाध्यात्मक परिस्थितिलाई मानेका हौं,
महाधिवेशनमा कसको पल्ला कति भारी भन्ने चिज
देखिन्छ’, स्रोतले भन्यो ।
पछिल्लो पटक प्रचण्डका अनेक प्रकरणबारे आउने विषयविरुद्ध प्रतिरोधमा उत्रिने
सापकोटाले अमेरिका भ्रमणका बेला आएको उजुरी सम्बन्धी प्रकरणमा मिडिया–मिडियामा फोन गरेर झूठो समाचार सम्प्रेषण नगर्न
भनी हटाउन दबाब पनि दिएका थिए । उनले केही मिडियामा ‘फेरि वाइसीएल अध्यक्षले धम्की दियो नभन्नुहोला’ पनि भनेका थिए । प्रचण्ड गुटनिकट एक मिडियामा
समाचार हटाउन उनले दबाब दिएपछि निमेषभरमा समाचार गायब बनाइएको थियो । यो सापकोटाले
प्रचण्ड र उनका परिवार खुसी बनाउने काम थियो, अपेक्षाको पदमा पुग्न ।
प्रचण्डलाई खुसी बनाउनका लागि सापकोटा सक्रिय भएको लामो समय पनि भएको छैन ।
वाइसीएलको महासचिव बन्दासम्म उनको सम्बन्ध खुमलटारसँग गज्जबको थिएन । स्रोतले
भन्यो,‘पछिल्लो एक बर्षमा कामले
होइन, चाप्लुसीका कारण
खुमलटारमा प्रवेश पाएका थिए । अहिले प्रचण्डको असली सिपाही हुँ भन्छन् ।’
उनले यतिमात्र गरेका थिएनन् । तत्कालिन एमाले र माओवादीबीचको भागवन्डामा युवा
र विद्यार्थीमा खिचातानी पर्ने, युवा एमाले र
विद्यार्थी माओवादीको भागमा पर्ने भएपछि अर्को रणनीतिक चालमा अभ्यस्त भए । अखिल
क्रान्तिकारीमा रहेका केही विद्यार्थीलाई ऐन महरको सहयोग र रञ्जित तामाङविरुद्धमा
संगठित हुन पनि गोप्य छलफल गरे । स्वार्थ थियो, महरले विद्यार्थी पाए युवाको नेतृत्वमा आफ्नो वाकओभर ।
स्रोतले भन्यो,‘तामाङलाई झापाली
भएको र ओलीको मान्छे भनेर खुमलटारमा कान फुकी भागवन्डामा युवा संघमा दबाब राख्न
प्रचण्डसँग अनुनय विनय गरिएको थियो, यो रणनीति तयार पारिएको थियो ।’
सापकोटाले बालुवाटारमा कागज गरी अध्यक्ष पद पाएको भन्ने विषयको सार्वजनिक
खण्डन गर्दै आएका छन् । उनले चरित्र हत्या गर्ने हिसाबले यसरी मिडियाका आउन थालेको
पनि बताउदै आएका छन् । तर सत्यचाहिँ उनलाई बहुमत युवाले अध्यक्ष स्वीकार गर्न
मानेका छैनन् ।
नेपालको युवा आन्दोलन र संगठनात्मक संरचनालाई व्यवस्थित बनाउन तत्कालिन
एमालेले निक्कै उर्जाशील नेता उत्पादन गरेको थियो । हालका प्रधानमन्त्री केपी
शर्मा ओलीका पालामा स्थापित भएको तत्कालिन प्रजातान्त्रिक राष्ट्रिय युवा संघ,
ओलीकै घोषणामा तत्कालिन वाइसीएलसँग प्रतिरोध
गर्न गठन भएको युथ फोर्स र त्यसको परिमार्जित वैचारिक युवा संगठन युवा संघमा
सापकोटा वाइसीएलको छायाँ लिएर छिरेका हुन् । ‘एकीकरण भन्नासाथ वैचारिक र व्यवस्थित गर्ने स्कुलिङको अपमान
सहन सकिँदैन’, युवा संघका एक
केन्द्रीय सदस्यले भने,‘हिजो मुठभेड
गरेको कमजोर संगठनका र विघटित संगठनका व्यक्तिलाई कसरी नेता मान्नु ?’
त्यसो त सापकोटालाई दिएको जिम्मेवारीमा खुसी नभएको संकेत तत्कालिन युवा संघका
अध्यक्ष रमेश पौडेलले पनि गरेका थिए । उनले बाध्यात्मक अवस्थामा सह–संयोजकको जिम्मेवारी लिनुपरेको संकेतसहितको
सन्देश सार्वजनिक गरेका थिए ।
‘राजनीतिमा थकाई भन्ने चिज हुँदैन’ भन्दै पौडेलले मदन भण्डारी र जीवराज आश्रितको स्मृति दिवसको झिसमिसेमै विचार
पोख्नु त्यसैको पूर्वसन्ध्यामा गरिएको
युवा संघको नेतृत्वको निर्णयप्रतिको भावना प्रतिबिम्ब थियो ।
0 Comments