त्रिभुवन विमानस्थलमा आइजीपी खनालको आकस्मिक निरीक्षण

काठमाडौँ, ३० साउन । प्रहरी महानिरीक्षक सर्वेन्द्र खनालले त्रिभुवन अन्तर्राष्ट्रिय विमानस्थलमा यात्रुलाई छिटो, छरितो र सुविधायुक्त सेवा दिनुपर्ने बताउनुभएको छ ।

त्रिभुवन अन्तर्राष्ट्रिय विमानस्थलको आज निरीक्षण गर्दै उहाँले नेपाल भ्रमण वर्ष २०२० लाई सफल बनाउन विमानस्थल प्रहरीको महत्वपूर्ण भूमिका रहेको उल्लेख गर्नुभयो ।

“प्रहरीले दिने सेवाका कारण नै नेपाल भ्रमण वर्ष सफल भए नभएको प्रष्ट हुन्छ, नेपाल भ्रमण वर्ष सफल बनाउन गुणस्तरीय सेवाका लागि प्रहरी  लाग्नुपर्छ,”–उहाँले भन्नुभयो । नेपाल भ्रमण वर्ष सफल बनाउन प्रहरीबाटै सुधारको खाँचो रहेको उहाँको भनाई थियो ।

महानिरीक्षक खनालले विदेशी पाहुनाले नेपाल कस्तो छ भन्ने कुरा विमानस्थलबाटै थाहा पाउने हुँदा विमानस्थलको सरसफाईबारे विशेष ध्यान दिनुपर्ने बताउनुभयो ।

उहाँले विमानस्थलमा कार्यरत प्रहरी कर्मचारीको क्षमता अभिवृद्धिमा प्रहरी प्रधान कार्यालयले विशेष चासो दिएको उल्लेख गर्नुभयो । महानिरीक्षक खनालले विदेशी पाहुनालाई मिठो बोली व्यवहारका साथ ‘स्वागत’ र ‘धन्यवाद’ भन्न प्रहरी लजाउन नहुने बताउनुभयो ।

पछिल्लो समय विमानस्थलमा सुनलगायत विभिन्न इलेक्ट्रोनिक्स समानको अवैध तस्करी बढेको, विमानस्थलका कर्मचारीले यात्रुहरुको लगेज लैजाने वा निकाल्ने क्रममा जथाभावी फालेकोलगायतका आरोप लागिरेहका बेला उहाँले विमानस्थलभित्र हुने आपराधिक क्रियाकलाप रोक्न निर्देशन समेत दिनुभएको हो ।

सोही अवसरमा महानिरीक्षक खनालले विमानस्थलको सुरक्षा सम्बन्धी व्यवस्थाको बारेमा जानकारी समेत लिनुभएको थियो ।