नेपाल भ्रमण वर्ष : टिपर र ट्रकमा भ्रमण वर्षको लोगो टाँसियो (तस्बिरसहित)

काठमाडौँ, १४ पुस । नेपाल भ्रमण वर्ष–२०२० को सुरुवातसँगै टिपर तथा ट्रकमा नेपाल भ्रमण वर्षको लोगो टाँसिएको छ ।

नेपाल टिपर तथा ट्रक व्यवसाय समितिले आज २०० टिपर तथा ट्रकमा भ्रमण वर्षको लोगो टाँसेको हो ।

कार्यक्रममा महानगरीय प्रहरी वृत्त थानकोटका प्रमुख, प्रहरी नायव उपरीक्षक घनश्याम श्रेष्ठले भ्रमण वर्षमा २० लाख पर्यटक भित्र्याउन उक्त अभियानले सहयोग पुग्ने विश्वास व्यक्त गर्नुभयो । उहाँले पछिल्लो समय टिपर तथा ट्रक दुर्घटना बढ्दै गएको भन्दै यसलाई न्यूनीकरणका लागि विशेष अभियान सञ्चालन गर्नुपर्ने बताउनुभयो ।

नेपाल यातायात व्यवसायी राष्ट्रिय महासङ्घको उपाध्यक्ष यादवलाल श्रेष्ठले सरकारको नेतृत्वमा सुरु भएको भ्रमण वर्षलाई सफल बनाउन चालिएको कदम सराहनीय भएको बताउनुभयो । उहाँले भ्रमण वर्ष राखेका मालवाहक सवारी साधनलाई सरकारले सहयोग गर्नुपर्ने उल्लेख गर्नुभयो ।

नेपाल यातायात व्यवसायी राष्ट्रिय महासङ्घ प्रदेश ३ का संयोजक धर्म रिमाल, समितिका अध्यक्ष रामकुमार चापागाईँलगायतले देशभर रहेका सबै टिपर तथा ट्रकमा भ्रमण वर्ष अङ्कीत लोगो टाँसिने बताउनुभयो ।