अस्ट्रेलियाको डढेलो नियन्त्रण बाहिर, आपतकालीन घोषणा

एजेन्सी। अस्ट्रेलियाको क्यानबेरामा बढ्दो डढेलो नियन्त्रणमा नआएपछि आपतकालीन घोषणा गरिएको छ।

शुक्रबार अस्ट्रेलियाका अधिकारीहरूले राजधानी सहर क्यानबेरा र वरपरका क्षेत्रमा लागेको डढेलो नियन्त्रण बाहिर भएपछि आपतकालीन घोषणा गरेका हुन्।

क्यानबेराका मुख्यमन्त्री एन्ड्रिउ बार्रले सन् २००३ मा लागेको डढेलोपछि पहिलो पटक आपतकालीन घोषणा गरेको बताएका हुन्।

अधिकारीका अनुसार अनियन्त्रित डढेलो १८५ स्क्वायर किलोमिटरसम्म फैलिसकेको छ।

उक्त आपतकालीन अवस्था ७२ घण्टासम्म लागू हुने र अधिकारीहरूलाई सहर खाली गर्न, सडक बन्द गर्न अधिकार दिइएको रोयटर्सले जनाएको छ।

गत सेप्टेम्बरदेखि अस्ट्रेलियाको इष्ट कोस्टसम्म फैलिएको डढेलो नियन्त्रण गर्न अग्नि नियन्त्रकहरूले प्रयास गरिरहेका छन्।

डढेलोले ३३ जनाको ज्यान गइसकेको छ भने ५० करोडभन्दा बढी पशुपंक्षीको मृत्यु भइसकेको बताइएको छ।

करिब २५ सय घर आगोले नष्ट भइसकेका छन्।

यसअघि सन् २००३ मा आपतकालीन घोषणा हुँदा क्यानबेरामा चार जनाको मृत्यु भएको थियो। करिब ५०० जना घाइते भएका थिए भने ४७० घर नष्ट भएका थिए।